Tanlov umumiy nizomi

Iqtidorli talaba yoshlar, yosh mutaxassislar, tadqiqotchilar va pedagoglar, hamda maktab o‘quvchi yoshlari ishtirokida

«O‘ZBEKISTON MILLIY ROBOTLAR MUSOBAQASI» ROBOTOTEXNIKA TANLOVIni o‘tkazish to‘g‘risidagi

NIZOM

1. UMUMIY QOIDALAR

1.1 Ushbu nizom O‘zbekiston Respublikasida o‘tkaziladigan barcha turdagi robototexnika musobaqalarini tashkil etish, boshqarish va o‘tkazish uchun umumiy qoidalarni belgilaydi.

1.2 Nizom musobaqaning barcha bosqichlari va yo‘nalishlarida qat’iy amal qilinadigan asosiy hujjat bo‘lib xizmat qiladi. Musobaqaga oid barcha qo‘shimcha reglamentlar ushbu nizomga zid bo‘lmasligi lozim.

1.3 Nizom quyidagi maqsadlarni ko‘zlaydi:

Yoshlar o‘rtasida ilmiy-texnik ijodkorlikni rivojlantirish va texnologiyaga qiziqishni oshirish.
Innovatsion texnologiyalarni targ‘ib qilish.
O‘zbekiston yoshlarini xalqaro maydonda tanitish uchun tayyorlash.

1.4 Ushbu nizomda ko‘rsatilmagan barcha masalalar musobaqa reglamentlari orqali tartibga solinadi.

2. MUSOBAQA TASHKILOTCHILARI

2.1 Musobaqani tashkil etish va boshqarish uchun maxsus Tashkiliy Qo‘mita tuziladi.

2.2 Tashkiliy Qo‘mita quyidagi funksiyalarni bajaradi:

Musobaqa reglamentlarini tasdiqlash.
Hakamlar hay’atini shakllantirish.
Musobaqaning texnik va tashkiliy masalalarini hal qilish.
Shikoyatlar va apellyatsiyalarni ko‘rib chiqish.

2.3 Tashkiliy Qo‘mita o‘z faoliyatida mustaqil bo‘lib, barcha qarorlar yakuniy hisoblanadi.

3. MUSOBAQA ISHTIROKCHILARI

3.1 Musobaqada robototexnika va texnologiyalarga qiziquvchi barcha yoshdagi ishtirokchilar qatnashishi mumkin.

3.2 Ishtirokchilar musobaqada qatnashish uchun shaxsini tasdiqlovchi hujjatlarni taqdim etishlari shart.

3.3 Har bir ishtirokchi yoki jamoa ushbu nizom va musobaqa reglamentlariga amal qilish majburiyatini oladi.

4. ROBOTLAR UCHUN UMUMIY TALABLAR

4.1 Robotlar xavfsiz, texnik jihatdan ishonchli va ishlashga yaroqli bo‘lishi kerak.

4.2 Har bir robotning texnik parametrlari musobaqa reglamentlarida keltiriladi. Ushbu parametrlarga quyidagilar kiradi:

Maksimal o‘lchamlar va vazn.
Quvvat manbalariga qo‘yiladigan talablar.
Ruxsat etilgan materiallar va texnologiyalar.

4.3 Texnik nosozlik sababli xavf tug‘diradigan robotlar musobaqadan chetlatiladi.

5. MUSOBAQA O‘TKAZISH TARTIBI

5.1 Musobaqalar Tashkiliy Qo‘mita tomonidan tasdiqlangan reglament asosida o‘tkaziladi.

5.2 Ishtirokchilar va tomoshabinlar musobaqa hududida Tashkiliy Qo‘mita tomonidan belgilangan qoidalarga rioya qilishlari shart.

5.3 Barcha robotlar musobaqadan oldin texnik ekspertizadan o‘tkaziladi. Texnik talablarga javob bermaydigan robotlar musobaqaga qo‘yilmaydi.

5.4 Musobaqa maydoniga faqat Tashkiliy Qo‘mita ruxsat bergan shaxslar kirishi mumkin.

6. HAKAMLAR HAY’ATI

6.1 Hakamlar hay’ati Tashkiliy Qo‘mita tomonidan shakllantiriladi va musobaqa davomida qoidalarning bajarilishini nazorat qiladi.

6.2 Hakamlar hay’ati quyidagi vazifalarni bajaradi:

Qoidalarga rioya etilishini ta’minlash.
Bahsli holatlarda yakuniy qaror qabul qilish.
Ishtirokchilarning texnik talablarga muvofiqligini baholash.

6.3 Hakamlar qarori yakuniy hisoblanadi va qayta ko‘rib chiqilmaydi.

7. SHIKOYATLAR VA APELLYATSIYA

7.1 Ishtirokchilar Tashkiliy Qo‘mitaga shikoyatlarni yozma shaklda taqdim etishlari mumkin.

7.2 Shikoyatlar musobaqa bosqichi yakunidan 10 daqiqa ichida topshirilishi lozim.

7.3 Apellyatsiyalar Tashkiliy Qo‘mita tomonidan ko‘rib chiqilib, tegishli qaror qabul qilinadi.

8. TAQIQLANGAN HOLATLAR

8.1 Quyidagi harakatlar qat’iyan taqiqlanadi:

Har qanday yonuvchi, portlovchi yoki zarar yetkazuvchi materiallardan foydalanish.
Tashkiliy Qo‘mita ruxsatisiz maydonga kiritilmagan uskunalardan foydalanish.
Har qanday shaklda o‘z WI-FI tarmog‘ini yaratish.
Spirtli ichimliklar iste’mol qilish yoki musobaqa hududiga olib kirish.
Binolar ichida chekish.
Musobaqa qatnashchilari va tomoshabinlari uchun xavf tug‘diruvchi har qanday harakat.
Ma’muriyat ruxsatisiz xizmat hududlariga kirish.

8.2 Ushbu qoidalarni buzgan ishtirokchilar yoki tashrif buyuruvchilar diskvalifikatsiya qilinadi va hududdan chiqariladi.

9. XAVFSIZLIK VA TARTIB

9.1 Musobaqa davomida xavfsizlik qoidalariga qat’iy amal qilish kerak.

9.2 Ishtirokchilar va tomoshabinlar musobaqa hududida Tashkiliy Qo‘mita ko‘rsatmalariga amal qilishlari shart.

9.3 Tashkiliy Qo‘mita xavfsizlik choralariga rioya etilishini nazorat qiladi.

9.4 Barcha ishtirokchilar va tashrif buyuruvchilar:

Tinchlik va tartibni saqlashi.
Ma’muriyatning qonuniy ko‘rsatmalariga rioya qilishi.
Inshoot va asbob-uskunalardan ehtiyotkorlik bilan foydalanishi.
Boshqalarga xavf tug‘dirmaslik uchun o‘zini mas’uliyatli tutishi.
Yosh bolalarni qarovsiz qoldirmasligi lozim.

10. QO‘SHIMCHA QOIDALAR

10.1 Musobaqaning maxsus qoidalari va reglamentlari rasmiy sayt orqali e’lon qilinadi.

10.2 Tashkiliy Qo‘mita musobaqa reglamentlariga o‘zgartirishlar kiritish huquqiga ega.

10.3 Nizomda nazarda tutilmagan holatlar yuzaga kelganda, Tashkiliy Qo‘mitaning qarori ustuvor hisoblanadi.

11. QO‘SHIMCHA SHARTLAR

11.1 Barcha ishtirokchilar musobaqani o‘tkazish va xavfsizlikni ta’minlash uchun zarur bo‘lgan qo‘shimcha hujjatlar va ma’lumotlarni tashkilotchilar va vakolatli xavfsizlik xodimlari talabiga binoan taqdim etishlari shart.

11.2 Barcha ishlar va qurilmalar atrofdagi odamlarga, boshqa robotlarga, qurilmalarga yoki raqobatga hech qanday zarar yetkazmaslik uchun ishlab chiqarilishi kerak.

11.3 Chempionat davomida ishtirokchilar tashkilotchilar tomonidan taqdim etilgan axborot nishoni bilan bo‘lishi kerak.

12. NATIJALARNI UMUMLASHTIRISH VA TAQDIRLASH

12.1 Musobaqa g‘oliblari musobaqaning har bir toifasi bo‘yicha tegishli tartibda aniqlanadi.

12.2 Har bir yo‘nalishda uchta sovrinli o‘rin belgilanadi. I, II va III o‘rinlarni egallagan tanlov g‘oliblari diplom va esdalik sovg‘alari bilan taqdirlanadi.

12.3 Maxsus nominatsiyalar yoki alohida e’tirof etilgan ishlanmalar uchun homiylar tomonidan esdalik sovg‘alari berilishi mumkin.

12.4 Tashkiliy Qo‘mita musobaqa sovrinlari yoki maxsus mukofotlar ro‘yxatini kengaytirish huquqiga ega.

Bu hujjat musobaqani tashkil qilish va o‘tkazish uchun universal hujjat sifatida xizmat qiladi va barcha qo‘shimcha reglamentlar unga muvofiq ishlab chiqiladi.